Кітапхана ұжымы қазақ тіл білімінің атасы Ахмет Байтұрсынұлының 150 жылдығына орай Өскемен қаласы №20 орта мектебінің 7 сынып оқушылары арасында «Ұлт ұстазы» атты зияткерлік сайысын өткізді. Тартысты білім бәйгесі барысында оқушылар алаш арысының өмірі мен шығармашылығы туралы бірқатар сұрақтарға жауап беріп, «Егіннің бастары», «Түлкі мен қарға» мысалдарынан сахналық көрініс қойды. Сайыс барысында алғырлықтарымен көзге түскен «Алаш» тобы мен «Азат» тобы да ұлт зиялысы Ахмет Байтұрсынұлының атындағы мектепте оқитындықтарын мақтанышпен жеткізді. Сондай-ақ шараға қатысушылар Ахмет Байтұрсынұлының шығармашылығынан мәлімет беретін кітапхана қорында жинақталған кітаптарымен де танысты. Білім бәйгесі соңында жеңімпаз топтар кітапхана әкімшілігі атынан алғыс хаттармен марапатталды.
