III жалпы Республикалық «Kitap time – 2024» фестивалі аясында қазақтың маңдай алды жұлдызы, әдебиет жауһары Шериаздан Елеукеновтың туғанына 95 жыл толуына орай кітапханада «Еліне елеулі Елеукенов» атты әдеби қоржын өтті. Рухани кеш барысында Ш. Елеукеновтың шығармалары талданып, әсіресе «Әттең, дүние» романына көбірек тоқталдық. Шарада Ш. Елеукеновтың Алаш зиялыларының ақталуына қосқан үлесі, сондай-ақ Мағжан Жұмабаевтың өмірі мен шығармашылығы жайында «Мағжан» атты көлемді кітабы жайлы ақпараттар берілді.
Жазушы тек Мағжан ғана емес, алаштың аса көрнекті тұлғалары – Ш.Құдайбердиев, А. Байтұрсынов, М.Дулатов, Ж. Аймауытовтарға арнап «Жаңа жолдан» («С новой строки») атты екі тілде кітап жазды. Оқырмандар Ш.Елеукеновтың «Базарлық» атты әңгімесімен танысып, оның ішінен ұлттық құндылыққа қатысты сөздерге тоқталды, мәселен: күбі, айран, базарлық сияқты сөздердің мағынасын түсіндірді. Кеш қонақтары автордың шығармаларымен таныса келе, оны сан қырынан танып, рухани азық алды деген ойдамыз.
