Бүгін кітапхана төрінде “Халықаралық жыршы-термешілер одағынының” ШҚО филиалы директоры, Мәдениет саласының үздігі, айтыскер ақын Серік Қуанғанұлымен танымдық-тағылымдық, әдеби-сазды кездесу кеші өтті.
Екі сағатқа созылған шара барысында көрермендер С.Қуанғанның өмірі мен өнері жайлы арнайы дайындалған бейнеролик тамашалап, сұрақ-жауапқа құрылған сұхбатқа құлақ түрді.Әрмен қарай кейіпкердің және келген құрметті қонақтардың қатысуымен “Асық ату”,” Шарды дәл түсір” ойындары ойналды. Ойын ойнап бір сергіп алған соң кеш иесі – қолына қасиетті қара домбырасын алып, әннен шашу шашып, жиылған көпшілікке арнау айтты. Айтыс деген ақсүйек төл өнердің көшінде жүрген Дәулеткерей Кәпұлы, Бауыржан Халиолла, Мұхтар Ниязов сынды мүйізі қарағайдай айтыскер ақындар да әлеуметтік желі арқылы өздерінің жылы лебіздерін жолдады. С.Қуанғанды арнайы құттықтап өзінің өнерін тарту ретінде ала келген Ұлан аудандық мәдениет үйінің қызметкері, “ӘнСалДар” тобының мүшесі, ҚР мәдениет қайраткері, дәстүрлі әнші Қадыхан Манай әуелетіп ән шырқады. Бұл кешке “ҚР Жазушылар одағынының” ШҚО филиалы директоры Ә.Қаңтарбаев,
облыстық Кәсіподақ ұйымының төрағасы Т.Түсіпбеков, Алаштың ақтаңгер ақыны А.Кәкенов, айтыскер С.Құсанбаев, қалалық Мәдениет бөлімінің басшысы, ақын Қ.Сарин, Ұлан аудандық мәслихатының депутаты Н. Тілеужан, қалалық мәслихат депутаты Ә.Ақтай, ақын журналистер Қ.Дүргінбай, О.Керейхан және О.Жеңісұлы, қаламыздағы 5518 әскери бөлімшесінің сарбаздары мен С.Аманжолов атындағы университеттің студенттері арнайы шақырылған құрметті қонақ болып қатысты. Кеш соңында қонақтар естелікке суретке түсіп, алғыс айтып тарқасты!
