Шығыс қазақстан облыстық балалар және жасөспірімдер кітапханасында лингвист – ғалым, түркітанушы, филология ғылымдарының докторы, профессор Алтай Сәрсенұлы Аманжоловтың туғанына 90 жыл толуына орай «Ұлы түркітанушы мұрасы» атты облыстық өлкетану конференциясы өткізілді.
Конференция тақырыбы оқырмандардың назарын А.С. Аманжолов тұлғасының жан-жақтылығына аударуға, ғалымдардың, профессорлардың, қоғам қайраткерлерінің оның іргелі еңбектеріндегі ғылыми көзқарастарымен танысуға мүмкіндік берді.
Конференция спикері – өлкетанушы, мұрағатшы, Шығыс Қазақстан тарихында із қалдырған тұлғалар туралы көптеген очерктердің авторы Әубәкіров Алдияр Ақылбекұлы «Алтай Сәрсенұлының ғылыми, педагогикалық және қоғамдық қызметі» жайлы мәлімет беріп, фотосуреттер мен мұрағаттық құжаттармен таныстырды.
«№48 мектеп-қосымша білім беру орталығының» қазақ тілі мен әдебиеті пәні мұғалімі Сүлейменова Балжан Әсемханқызы «Түркі әлемінің жүгін арқалаған ғалым» тақырыбында баяндама жасап, бүкіл болмыс-бітімі елден ерек тұратын Алтай Сәрсенұлының ғұмырын көне түркі жазбаларын зерттеуге арнаған, сол жолда ерен еңбек еткен ұлы ғалым екендігін жеткізді.
С.Аманжолов атындағы Шығыс Қазақстан университетінің жетекші кітапханашысы Төлеуханова Раушан Ағзамбекқызы «Бабалар жазуы – Алтай Аманжолов өмірінің темірқазығы» атты кітап көрмесімен таныстырды. Көрмеге ғалымның елімізде және алыс-жақын шетелдерде жарық көрген кітаптары қойылып, олар туралы нақты ақпараттар берілді.
Сондай-ақ, конференция қонақтары А.Сәрсенұлының көптеген монографиялары Шығыс Қазақстан облысының елді мекендері мен топонимдерінің шығу тарихына арналған ғылыми еңбектерімен, түркология саласындағы зерттеулерімен таныса отырып, ата-бабаларымыздың, этносымыздың, халқымыздың және оның мәдениетінің шығу тегі мен тамырын тереңірек түсінуге мүмкіндік алды.
