Кітап сүйер қауым әрбір шығармасын асыға күтетін жазушы, ҚР еңбек сіңірген қайраткері Сәуле Досжанмен кітапхана оқырмандары үшін «Әйел аты – ұлылық» тақырыбында онлайн-кездесу ұйымдастырылды. Кездесу барысында қаламгердің соңғы шыққан шығармалары жайлы әңгіме өрбіп, қазіргі таңдағы әдебиеттің хал-ахуалы туралы айтылды. Әрбір кітабының жазылу тарихына да тоқталып өткен автор полигон жайлы жазылған «Қасірет пен тағдыр» шығармасына, әйелдер тағдырын ашып көрсететін «Жалғыздың жарасы» кітабына тоқтала отырып, нарықтық өмір көшіне ілесуді үйрететін «Ауылдан шыққан миллионер» шығармасына арқау болған қызықты оқиғалар туралы баяндады. Шараға қатысушылар жазушыға өздерін толғандырған сұрақтарын қойып, оған көңілге қонымды жауап ала білді. Автор оқырмандардың сұрауы бойынша әсіресе, әлеуметтік желі беттерінде қызу талқыға түскен “Анасын іздеген ұл” шығармасының жазылуына себеп болған жағдайларды да атап көрсетті. Шара соңында Сәуле Мағазбекқызы болашақ жоспарларымен бөлісіп, онлайн-кездесу ұйымдастырған Облыстық балалар және жасөспірімдер кітапханасының ұжымына және ШҚО әр түкпірінен келген әріптестерімізге ризашылығын білдірді. Жүрекке жылы тиетін шығармаларын оқырманға сыйлап жүрген қарымды қаламгерге ұжымның атынан шығармашылық табыс тілейміз.
