Бүгін кітапхана төрінде Қазақстан мен Орта Азияға аты мәлім болған қазақ елінің өркендеп дамуына елеулі үлес қосқан, қазақ халқының мақтанышы, Сыр түлегі – Темірбек Жүргеновтың туғанына 125 жыл толуына орай қала студентеріне «Асыл өнердің алып нары» атты шара өтті.
Темірбек Қараұлының есімі тек қана қазаққа ғана емес, иісі түркі жұртына мәлім, қоғам және мемлекет қайраткері, қаламы қарымды сыншы-көсемсөз иесі.
Іс-шараның бірінші бөлімінде қатысушылар «Саясат сатысында», «Зерделі зертеуші», «Ел есінде» ұяшықтары арқылы мемлекет қайраткері және журналист Темірбек Жүргенов туралы ақпараттарға қанық болып, ұлт рухын түлеткен тұлға жайлы мол деректермен танысты.
Келелі кездесудің екінші бөлімінде Т.Жүргенов атындағы Қазақ Ұлттық Өнер Академиясының түлектері, ШҚ облыстық драма театрының өнерпаздары атап айтсақ «Мәдениет саласының үздігі» Сайраш Бақтиярқызы, актер Ернат Мұхамедханов, жастар театрының көркемдік жетекшісі Едіге Ақылбеков, Алмажай Төремұрат, Ақжол Сақанов, Думан Исахановпен сырлы сұхбат өрбіді. Талантты өнерпаздар тәмамдаған оқу орындары, мамандықтары жайы кеңінен баяндап беріп, өнер өлкесіндегі шығармашылық жанның толғанысы мен тебіренісі жайлы жеткізді.
Сондай-ақ кеш меймандарымен “Киноны тап?”, “Актерлар ертегі әлемінде”,”Пайдалы Time” қызықты ойындарын ойнап, монолог оқып, әсем ән шырқап, өнер адамына қажетті қыр-сырларымен бөлісті.
Сұхбат соңында оқырмандар көкейде жүрген сан-алуан сауалдарын жолдап, тақырыпқа сай кітап көрмесі көпшілік назарына ұсынылды.
