Адамзат баласының жан дүниесін жақсылық сезімдерге бөлейтін асыл қазына кітап десек, бүлдіршіндерге бала кезден «ажырамас достарың – кітап» дегенді үйрететін кітапхана. Осыған орай Облыстық балалар және жасөспірімдер кітапханасында «№15 «Рахат» балабақша-бөбекжайы» КМҚК-нің кішкентай бүлдіршіндері қонақта болып қайтты. Кітаптар әлеміне саяхат жасаған балабақша тәрбиеленушілері кітапхана қорындағы өздеріне арналған түрлі кітаптармен танысып, қызықты ертегі тыңдады. Көңілді саяхатқа куә болған балғындар әрмен қарай ойын залында Күлдіргі Бүлдіргімен «Доп-домалақ», «Мысық пен Тышқан», «Кел, билейік!», «Тез, тап!» қызықты ойындарымен қатар тосын сыйларға тап болып көңілдері шаттыққа кенелді. Жол жүру ережелерін жақсы меңгерген балалар, «Бағдаршам» атты танымдық сабаққа да қатысып, жол сақшысының жасырған жұмбақтарын шешіп, өздерінің алғыр екендіктерін де танытты. Әдеби саяхат барысында жүздері бал-бұл жайнаған бөбектер кітапхананың өлкетану орталығында қонақта болып, туған өлке жайлы пайдалы ақпараттар алып, «САҚ» этно-мәдени орталығындағы сапарларында қазақ халқының тұрмыста қолданған көне заттарымен танысып, мол мәліметтерді бойларына сіңіріп, қуанышпен тарқасты.
