Кітапханамызда жыл сайын дәстүрге айналған «Кітап галактикасы шақырады» атты Оқу мейрамы-2023 өткізілді. Оқу мейрамы аясында «Переверным мир с ног на голову» Облыстық жазғы оқу сайысы – 2023 биыл да өз жеңімпаздарын анықтады. Ең алғыр, зерек, кітапты көп оқыған балдырғандар үш номинация бойынша бақ сынап, жүлделі орындар иеленіп, бағалы сыйлықтарға ие болды.
Кішкентай оқырмандармен аспан әлемінің сан алуан жаңалығын жатқа білетін Жұлдызша мен ертегі кейіпкері Алладин екеуі ғажайып кітап галактикасына саяхат жасады. Көңілді кешті ойлы сауалдарымен таңғалдырған рухани әлемнің иесі Кітап ханшайымы мерекенің көркін кіргізіп, бүлдіршіндермен қосыла ән шырқады. Саяхат барысында балалар кітап галактикасының тұрғындары Жұлдызша Алладинмен бірге «Жаңбыр, жаңбыр!», «Сана, ойла»,«Жұлдыздар,жарқырайды!» атты қызықты ойындарын ойнап, викториналық сұрақтарға тапқырлықпен жауап берді.Балдырғандардың сүйікті ертегі кейіпкері, сүйкімді Бауырсақтың «Доп-домалық» ойынына белсене қатысқан оқушылар білім деңгейлерінің жоғары екенін көрсетіп, шапшаңдықтарын байқатты. Ал тосыннан кештің шырқын бұзғысы келген ертегі кейіпкері Кащейге Бауырсақ пен ақылды балалар көмекке келіп, оқырмандармен бірге тапсырмалар орындап, жеңіп шықты. Мерекелік шара соңында «Оқу мейрамы – 2023» Облыстық жазғы оқу сайысының үздік деп танылған оқырмандарын «VITAМИР» сауда компаниясының бас директоры Каханов Виталий Александрович және ақын, Қазақстан Республикасы Мәдениет және спорт министрлігінің «Абай» атындағы медалінің иегері, «Жалғасы әке жырының» кітабының авторы Ихсанова Нұржанат Бақытқызы сондай-ақ жас прозашы республикалық проза байқауының жеңімпазы Әділ Әуезхан кітапхана әкімшілігі атынан алғыс хатпен марапаттап, балаларды мерекемен құттықтады.
