Қазақтың ұлы күйші-композиторы, төкпе күйдің атасы, аспапты музыка өнерінің классигі Құрманғазы Сағырбайұлының туғанына 205 жыл толуына орай кітапхана қызметкерлері Өскемен қаласы әкімдігінің Қ. Нұрғалиев атындағы № 43 мектеп лицейінің 9-сынып оқушыларына интерактивті сабақ өткізіп қайтты.
Шара барысында кітапханашылар күйшінің өмірі мен шығармашылығы тарихынан сыр шертіп, Құрманғазы күйлерінің шығу тарихынан ақпараттар беріп, «Балбырауын», «Адай», «Сарыарқа» сынды алты алашқа кеңінен танымал болған күйлерді оқушыларға ойнап көрсетті. 9-сынып оқушылары өздерін қызықтырған күйлер мен күйшілер туралы сұрақтар қойып, қосымша мәліметтерге қанықты. Домбыра ойнай алатын ұл-қыздар да ортаға шығып, өз өнерлерін көрсетті.
Сондай-ақ күйшінің өмірі, оның күйлері, қазақ ұлтының музыкалық аспаптары туралы сұрақтар жасырылған «Kahoot» ойыны ойнатылып, оқушылар өздерінің білімдерін сынады. Ойын соңында шараға қатысушылар аталмыш сабақтың өту барысы жайлы баяндап, алған әсерлерімен бөлісті.
